Apdeit: 10 Julae 
Kasem tedei i nokat konfem kes blong COVID-19 long Vanuatu​
  • Noia, ino gat konfem mo ino gat saspek keis blong COVID-19 long Vanuatu.
     
  • Wik ia oli gat wan saksesful end blong stej 1 blong ripatriesen plan blong ol sitisen blong Vanuatu mo ol residen blong ovasi we oli kambak. 1,528 pipol oli komplitim long 14 deis kwarantin sefli. Stej 2 blong ripatriesen plan hemi stat long Ogis. 
     
  • Long 11 June 2020, Steit blong Emejensi oli extendem o muvum I go blong 30 deis bakeken, a) blong ful Vanuatu olsem pat blong privensen mo kontenmen mejas blong COVID-19 aotbrek long wol tedei; mo blong b) rispon long impak blong kategori 5 Tropikol Saeklon.
     
  • Kavman hemi stap advaesem evriwan blong stopem fasin blong stap spredem ol ruma mo ol infomesen we ino stret. Ministri blong Helt nomo hemi praemeri sos blong ol stret mo ol apdeit helt infomesen blong Vanuatu mo hemi provaedem infomesen mo ol kwesten tru long plante gudfala platfom olsem websaed, Fesbuk, hotlaen, fri web peij mo email.​

Moa infomesen:
 

Vanuatu I selebretem wetem sakses End blong Stej 1   blong Ripatriesen Plan
1,528 ripatriet oli sefli stap long hom blong ol. Vanuatu i rimein yet COVID-19 fri
 
Port Vila, 10 Julae 2020: Ministri blong Helt blong Vanuatu hemi konfem se wetem sapot blong NDMO mo ol narafal Kavman Ejensi, Stej 1 blong Kavman ripatriesen plan hemi bin komplitim wetem sakses. 1,528 ripatriet oli stap nao sefli long hom wetem ol lav wan blong olgeta mo Vanuatu i rimein yet COVID-19 fri. 
 
Sakses ia hemi from  strikt travel mo kwarantin kondisen we NDMO i imposem wetem Ministri blong Helt anda long NDMO ‘Instramen blong Daereksen we I go long ol Kavman Ejensi we i rilet long COVID-19 mo Tropikel Saeklon Harold (Amendmen) Oda N0 77 blong 2020’ long deit blong 23 Mei, anda long Risk Disasta Manejmen Akt.
 
Everi 1,528 ripatriet we oli araev long kaontri bitwin 27 Mei mo 23 Jun oli spendem 14 dei long wan mandatori kwarantin long 15 diferen – fasiliti (hotel) we Kavman i aedentifaem blong oli stap long hem mo tu oli bin stap risivim helt monitoring long everidei. Long 8 Julae, oli bin rilis long komuniti blong olgeta wetem wan leta blong Ministri blong Helt we i setifae se oli stap long gud helt.
 
 “Hemia hemi wan namba blong ripatriet we yumi neva experiensem bifo  long wan very shot taem blong eni Pasifik Aelan Kaontri i save handelem”, we Len Tarivonda, Daerekta blong Pablik Helt i talem. “Be Vanuatu i demonstretem se yumi bin standap hae long wok ia. Ol sekta mo patna oli standap strong long ol jalenj blong mekem sua se ol pipol oli kambak long hom graon blong olgeta, oli bin lukaotem gud olgeta, mo oli fri long kwarantin stret taem blong 40 indipendens selebresen!” Daerekta Len Tarivonda i talem.
 
Anda long Pablik Helt Akt, kwarantin hemi wan pablik helt prikosen blong seperetem fisikeli ol peson we oli helti long ol narafala wan blong monitarem ol simtom blong COVOD-19. Long raem blong kwarantin period, ol sevis mo sapot we oli provaedem hemi inkludum akomodesen, kakai, eksesaes, everidei helt jek, saekososol asesmen mo sapot. Mo tu Ministri blong Helt hemi wok wetem Ofis blong Sivil Stetas blong mekem sua se olgeta we oli no gat nasonal ID kad oli bin kasem ol kad blong ol we oli prosesem long taem we oli stap  blong kwarantin.
 
Len Tarivonda Daerekta blong Pablik Helt i notem se “ Mifala i hapi se ol pipol ia oli stap seif long hom wetem famili blong olgeta afta long wan fes taem experiens long globol situesen blong COVID-19 pandemik”. Hemi talem tu se, “ Yumi talem tankio long olgeta wetem ol famili blong ol,long pesens mo koperesen long taem blong ol daerektiv blong ripatriesen mo tu blong folemap ol protocol blong kwarantin blong kipim kaontri blong yumi i stap seif.”
  
Long taem blong kwarantin ol ripatriet oli patisipet long wan sevei we tim blong saekososol sapot i kondaktem truaot long ol 15 kwarantin fasiliti. Aot long sevei ia 98% long ol pipol ia oli faenem se kwarantin hemi bin isi o ino had tumas.Mo long saed blong sefti long taem blong kwarantin, 98% long ol pipol oli talem se oli fil seif semtaem  87% oli save whu ia blong kontaktem long saed blong helt isiu. Be, i gat sam konsen we oli talem aot mo hemi abaot akseptens blong ol komuniti long taem blong rilis blong olgeta.
 
Ministri blong Helt hemi bin wok had tumas blong mekem sua se ol pablik helt infomesen i kontiniu mo ol helt tim oli rij aot long ol komuniti, from se plante taem ol infomesen we oli no stret we i kamaot long media hemi kosem fraet mo stikma. Ol aotrij tim oli enkejem ol lida we oli gat influens mo gudfala netwok tru long ol komuniti olsem ol jif, jej, ol okanaesesen blong ol woman mo ol yut blong mekem sua se i gat wan sapotiv envaeromen is tap long ples. Blong sapotem wok ia, ol provinsel helt tim oli stap long stanbae o redi  blong sapotem ol ripatriet taem we oli stap go bak long komuniti blong olgeta mo tu oli wok wetem ol komuniti stekholda blong mekem se ol intekresen blong ol pipol i go bak long komuniti hemi isi. 
 
“Letem yumi i  unaet olsem wan kaontri blong provaedem sapot long ol pipol ia wetem ol famili mo komuniti blong olgeta” Daerekta Tarivonda i talem – enkarejem ol famili mo fren, semak wetem ol komuniti blong provaedem akseptens mo aprisiesen long olgeta we oli rilis long kwarantin blong sakrifaes we oli mekem blong kipim kaontri i stap seif. 
 
Sapot blong Ministri blong Helt we i go long NDMO mo ol laen Kavman Ejensi blong manejem wan smut, seif ripatriesen mo kwarantin hemi bin ki blong kipim Vanuatu i seif. Everi Ejensi oli stap nao redi blong welkamem nekis lot blong ol ripatriet blong kam bak long hom afta long indipendens selebresen. Ol lesen we yumi lanem long Stej 1 bae hemi help blong mekem wan smut mo impruv proses blong nekis stej blong tekem i kam bak olgeta pipol ia we oli stap wet yet long ripatriesen blong olgeta long Vanuatu.
Spos yu kat fiva, kof mo no save pulum gud win, ko long wan helt senta klosap long yu. 
 
No tajem mo no go klosup long nara man. 

 

5 Samting blong Save
1. Wanem ia COVID-19?
COVID-19 hemi sot nem blong Coronavirus we hemi niu mo oli no bin faenem aot bifo long human. Coronavirus hemi kam aot long wan laj o bikfala famili blong ol vaeras we oli faenem long ol animol mo long ol human.

2. Wanem nao ol simptom blong COVID-19?

Long fulap kes, COVID-19 hemi kosem ol smol simtoms olsem nus I ron, trot I soa, kof mo fiva. Sik i save kam mo strong long sam man mo save mekem oli kasem pneumonia o problem blong no save pulum gud win. Long sam kes, infeksen I save mekem man I ded.

3. Olsem wanen nao COVID-19 hemi spred?

COVID-19 hemi spred isi nomo tru long ol klosap kontak wetem wan peson we hemi kasem vaeras ia. Taem we wan man we I kasem COVID-19 hemi kof o snis, ol smol droplet oli rilis mo spos yu stap klosap tumas, bae yu kasem vaeras ia I ko insaed long lang blong yu taem we  yu pulum win. 

4. Hu nao I stap long risk?

Yumi nid blong lanem moa long hao nao COVID-19 hemi afektem ol pipol. Ol olfala mo ol man we oli kat ol narafala sik olsem sik suka, sik blong hat, oli save stap long risk blong sik bigwan moa.

5. Wanem nao tritmen blong COVID-19?

Naoia I no kat meresin blong COVID-19. Be fulap simtoms oli save tritim.

5 Samting blong Makem 

1. Wasem han blong yu oltaem

Wasem ol han blong yu wetem sop mo wota o spos ol han blong yu oli no toti tumas , rabem han blong yu wetem wan prodak we I kat alkol long hem. Hemia bae I tekem aot vaeras we spos I stap long ol han blong yu
 

2. Kaveremap maot mo nus blong yu long elbo blong yu we yu benem o usum wan tisu taem yu kof  mo sniz

Sakem aot tisu we yu usum stret taem mo wasem han blong yu wetem sop mo wota o rabem han blong yu long wan prodak we I kat alkol long hem. Long fasin ia yu protektem ol narafala wan long eni vaeras we I kamaot taem we yu kof mo sniz
 

3. Spos hemi posibol, stap 1 mita longwe long narafala man we I kof, snis o I kasem fiva.

COVID-19 hemi save spred isi taem we yu stanap kolosap long wan man we hemi kasem vaeres ia vinis.
 

4. No tajem ae, nus mo maot.

Ol han oli save tajem ol ples we I kat vaeres ia long hem. Sapos yu tajem ae, nus o maot wetem han we hemi toti, yu save pasem vaeres ia we I stap long ples we yu tajem I ko long yu wan.
 

5. Spos yu kat fiva, kof mo no save pulum gud win, ko long wan medikol senta. 

Folem ol instraksen blong dokta o nes oltaem mo ol ofisel helt infomesen we hemi stap ko long pablik.

© MOH Vanuatu — All rights reserved.